Hodiaŭ, la Prezidantino de la Eŭropa Komisiono, Ursula von der Leyen, renkontiĝos kun la Serbia Prezidanto Aleksandar Vučić. Ĝuste nun, kiam serbiaj civitanoj estas ŝancelataj de subpremo, perforto kaj malĝojo, ĉi tiu vizito estas profunde nekonvena kaj politike malprudenta. Ĝi riskas signali, ke la valoroj de la Eŭropa Unio pri demokratio, libereco kaj respondeco estas intertrakteblaj.

“Kiel gardistino de la EU-traktatoj kaj la plej alta reprezentantino de ĉiuj eŭropaj civitanoj, Komisia Prezidantino Ursula von der Leyen havas devon defendi la regadon de leĝo, esprimliberon kaj la rajton al pacema protesto. Estas profunde bedaŭrinde, ke von der Leyen honoras Vučić-n per oficiala vizito sen videblaj rezervoj, dum lia reĝimo kontraŭleĝe arestas studentojn kaj opozicianojn kaj perforte subpremas protestantojn. Ĉi tio ne estas momento por fotŝancoj kaj manpremoj, sed por kuraĝo kaj morala klareco. La EU devas subteni la rajtojn kaj liberecojn de la serbia popolo,” diris Vula Tsetsi, Kunprezidantino de la Eŭropa Verda Partio.

La tragika kolapso de la tegmento de la fervoja stacio en Novi Sad je la 1-a de novembro 2024 mortigis 16 homojn kaj malkaŝis kronikan korupton kaj senpunemecon en la kerno de la reĝimo de Vučić. Preskaŭ unu jaron poste, la familioj de la viktimoj ankoraŭ atendas justecon. Protestoj postulantaj respondecon estis perforte dispelitaj, dum sendependaj ĵurnalistoj daŭre alfrontas timigon (fare de la aŭtoritatoj).

“Ni Verduloj firme kredas, ke oni devas permesi al la popolo de Serbio aliĝi al la EU-komunumo, se ĝi tion volas. Ni ankaŭ subtenas la legitimajn aspirojn de ĝia popolo vivi en libera, demokratia kaj justa socio. La Eŭropa Komisiono devas uzi sian politikan pezon por puŝi Vučić-n al liberaj kaj justaj balotoj en la baldaŭa estonteco, kaj al pacema transdono de potenco se tio estas la elekto de la popolo. Intertraktadoj pri aliĝo al la EU devas servi kiel levilo por demokratio, ne kiel rekompenco por subpremo. Se la Komisiono permesos, ke ĉi tiu vizito okazu sen klaraj kondiĉoj kaj elparolaj postuloj por justeco, oni memoros ĝin kiel la momenton kiam Eŭropo perdis sian moralan kompason kaj cedis al alia aŭtokratio,” aldonis la Kunprezidanto Ciarán Cuffe de la Eŭropa Verda Partio.

La Eŭropa Verda Partio alvokas Prezidantinon von der Leyen:

• Publike postuli de Vučić plenan respondecon kaj travideblecon en la enketoj pri la tragedio en Novi Sad.
• Kondiĉigi EU-fondusojn kaj aliĝpaŝojn per travideblaj progresoj en juĝistara sendependeco, amaskomunikila libereco kaj balota integreco.
• Videble kaj laŭte subteni la serbian popolon, kiu postulas justajn kaj liberajn balotojn, kaj ne tiujn, kiuj silentigas ĝin. Studentoj kaj la opozicio jam dum monatoj postulas balotojn.

---